廢青打散工手記

呢幾個月見面的朋友，都會問我，最近又做緊乜野散工。其實我都無做雜不甩散工好耐，近數個月埋首訪問寫文，寫文無幾多錢，我又產出緩慢，惟有每周做補習吊命。
 
老友結婚周年紀念，所以佢老公搵我幫佢公司間舖頂做店員，一日咁多。老友之前話，都有啲嘢做架，未必做到自己野。周日理應有客吖，但對我嚟講，完全唔忙囉，我可以聽歌打機寫文。大多數時間都沉淫喺思考中，間舖人來人往，我用舖頭部Mac機開着個Google文件，個腦喺道馳騁。再次感慨，shopkeeper真係一項買你嘅存在的工作，我難以想像，如果無自己嘢做，發吽竇發一日係咩玩法？好彩我個腦入面仲有個秘密世界俾我解吓悶。
 
早排先諗，自由業這種與世隔絕（只有親人和情人）的生活，原來好鬼無存在感。一個企劃一個人諗一個人做，一做就是幾個月（或者更耐），一個月先同人開一次會。以前做嘢日日對幾廿人講嘢，覺得成日講嘢不斷輸出，令人好攰。依家無同事少見朋友，關咗交際應酬對談mode，我唔識用直接表露情緒以外的方法去講嘢，一開口講說話，就好似周伯通玩左右互搏咁，可以一人分飾正反兩角，成個對話入面唔需要有其他人。如果你見到我，我唔出聲，或者唔應你，或者搭唔到嘴，唔好以為我寸，我只係未warm up內置生産說話部機器。
 

最近基本是便秘期，訪問寫文進展不良，過了珠寶展後都唔想接散工，但又好多人介紹工俾我喎。不如講下在身邊擦身而過、有接與無接的散工項目。

1. Art Central中Gallery Booth helper。

係朋友個老公whatsapp俾我，佢fb朋友wall上的招聘廣告，我fb msg咗佢，原來佢係代一個在澳洲的Gallery請人。（寫到呢道我不禁諗朋友的朋友係咪即係自己，媽我好亂）成$150一個鐘呀大佬。佢俾咗個電郵，叫我將CV發過去。事忙，過了一個星期先諗起發CV，才發現當日份工已經開始咗。

2. 功課輔導班導師。

學烏都語的同學知道我住邊區，佢係該區社區中心的社工，專門服務少數族裔，搞咗個功課輔導班，whatsapp問我有無興趣做義工。本來就很有興趣，但鑑於是一周三天，每個晚上2小時，我不禁計算，作為自由業者開始計較時間與賺的錢不成正比，於是我無覆佢。到我話佢知，我晚上會有兼職了不好意思，要推辭，才發現原來佢話的義工是有義工費的，每小時$100（咁叫義工，咁計我以前打工份份都係義工）。我才發現恨錯難返，又唔好意思咁樣衰即刻話，好啦我推咗份兼職接你個份啦。於是只能講一聲拜拜。

3. 電話問卷調查員。

1. 岩岩上咗保險公司見工，做大學校園問卷調查員(我的人生到底哪裡出錯了XD)。我申請時唔知係保險公司，諗住hea工就無謂着得太勁，牛仔褸配黑色燈芯絨長裙，背囊放notebook順便去自修室碼字。

原來jobsDB每日成千上萬份短期／兼職，真係乜嘢都有。我從前都唔知可以有咁多種類。而jobsDB個app真係相當方便，upload個cv，9 click就可以申請，求職信頓變old school，科技真係日新月異呀吓（年紀大mode），加速令人變成無文化無內涵，以前教落寫求職信乜格式乜禮儀，都唔駛再學咯。但當然，速度文化帶來的問題是來得快去得亦快，好幾份9 click的工，搵我我都懶去面試。

試過有保險公司搵臨時文員，電話直接問，做乜9我做開全職會走去做兼職，我解釋完，佢就問我有無興趣做星期一至五的文員，短短地三個月，但因我另有freelance，唔想全職，就拒絕咗佢。另外有份，我申請完都唔知係乜公司，個男人whatsapp叫我去油麻地彌敦道Starbucks見工，臨時文員喎，佢到底想我喺咖啡店表現咩skills佢睇？最後因為當日晏晝老竇臨時話同姪仔飲茶，我就無去到，臨in半小時whatsapp話something come up就算。

細個本着捧餐都唔夠力的覺悟努力讀書，於是去咗大學女工合作社飯堂玩咗兩日，孱仔如我攰X到呢。又見「團體」、「阿姐」，當然地勾起好多做女工組織的記憶同技能，阿姐團隊合作及建立，挑戰既多而獨特，不過呢啲留返俾自己觀照好了。

飲食業實在是第一次做。其實，我又ok開心喎。女工合作社做小食及午市碟頭飯，未至於茶餐廳咁把炮。除了剛開始比較緊張，埋位我有時會邊哼歌邊做。洗洗切切備料就最治癒，煎雞扒時我已經哼緊歌，今日一邊煮麵仲可以一邊唱幸福摩天輪。體力勞動，腦袋放空，重覆性動作做得多，確係會越做越找到秘訣。

但不代表唔辛苦喎！

先是長時間站立，腿痠軟。做每個位置都係企，廚房再乾淨，都係地滑，煎完扒周地都係油，洗嘢又會濺到水，着行山鞋都企唔穩，即使只係裝完飯轉身再去裝埋個兩餸，都要用返些少力先企得穩。為了就手，只轉腰不轉身，脊椎側彎的痛即刻黎料，咁我寧願郁腳都唔好傷腰啦。尋日收工同人哋去行街，坐喺food court腿攰到唔願行，連等位的開到聲，我地都唔肯郁。我就係腳掌同膝頭對上的肌肉發熱。食飯時仲俾阿姐笑，咁後生就攰。我就由細都係咁打壞嘅。

話說上星期已經返了最後一天的game promoter，本星期正式投入成為游手好閒賣衫收銀。朋友介紹一齊做，好似重返中學一齊去自修室。賣衫也是臨時性質，計落剛好賺到下月旅費，去完旅行先算。

5號時在whatsapp組內問幾時出糧，佢同我講10號前，到了7號那天，在開工途上，忍唔住whatsapp問出糧，滾都火埋，唔問都唔通知。佢話，請大家要明白佢地忙，計數核對需時。明咩白啫，準時出糧天經地義，我忍唔住小咗幾句，有條agent女話，你咁不滿，有咩直頭上嚟搵我XXX講。哇，我心諗你係咪short架，在廿九幾個promoters前表現成咁。實在我覺得開大眾群組是管理大忌。

深觀一下自己發窮惡的狀態。終於親身體驗到以前當值聽勞工法例諮詢時，啲友點解無糧出都照返工。其實我又唔爭那麼幾天用錢，但作為前勞工組織幹事，覺得自己竟然不能在7號前攞到人工，實在太折墮。深深覺得自己係在發脾氣，多於爭取。而事實上，如果我不是望住今年8月，在這種工作之中不斷打圈，是會絕望到死。