全球剝削七十年 香港迪士尼似足租界

02/11/2013 - 10:48am
Share

【惟工解密】關注零散工權益聯席日前抗議迪士尼以兼職取代全職,變相削減福利,遭迪士尼辣手報警清場,警察不惜用「非法入境」的牽強罪名迅速拘捕示威者,聽話到好似迪士尼出糧俾佢地咁。查實香港政府唔係第一日買佢怕,迪士尼刻薄員工亦歷史悠久,且聽惟工解密同大家講下故仔。

擋白車 收數簿 特權無限好

回歸後政府拉攏迪士尼來港起樂園,前特首董建華大力用公帑注資,興建費用平均花去每位市民3,000元,原則上好應該人人有份。點知樂園2005年起好之後唔單止唔發達,仲要年年蝕錢,而迪士尼一直冇向公眾交代盤數,去到2010年先至首次公開業績,黑箱程度黑過涼粉。終於到2011至12年度,香港迪士尼卒之有盈利,漫長過三年零八個月。

錢銀或者事小,人命必定關天,迪士尼一樣少理。2007年,一名遊客在樂園裡面懷疑心臟病發昏迷,警就一早報咗,不過救護車16 分鐘之後先至到場,達不到「12 分鐘內到場」的服務承諾,結果病人失救死亡。點解慢吞吞?消防處話,原來迪士尼唔畀白車開入去救人,要停喺閘門等候樂園車輛帶領,所以遲咗。踩入你地頭,錢收咗你,又自把自為唔需要跟你規矩做事,係咪好似中史書情節?係呀,租界咪差唔多咁款囉。

米奇米妮照拘捕 輸出假笑唔准嘈

香港迪士尼對付裝扮成灰姑娘和白馬王子的示威者絕不手軟,只是遵從國際慣例,2008年美國加州迪士尼樂園的附屬酒店員工不滿削減醫療福利,數百人爆發工潮,部份示威員工打扮成米奇、米妮靜坐抗議,一樣畀迪士尼報警拉人,鎖上手扣塔晒上豬籠車。千祈唔好以為迪士尼會對自己旗下卡通人物心軟。

好多香港人鍾意到此一遊的東京迪士尼樂園有種特產,叫「職業笑容」。坊間以為日本人向來服務表情十足,但作家藤原智美指出,八十年代之前日本僱主不會逼員工笑,直至東京迪士尼1983 年落成,「假笑機器」就漸漸流行。大阪大學精神病學家夏目誠警告,長期強逼自己笑可導致抑鬱症,日本打工仔真係多得迪士尼唔少。

憑雪姑發跡 富貴靠獨食

迪士尼創辦人和路迪士尼(Walt Disney)以動畫製作起家,最初待員工不薄,人工在三十年代初的美國動畫行內算是較高,其中一部份來自公司與員工的分紅。後來公司製作成名動畫《雪姑七友》時,和路迪士尼要求手下日夜趕工,員工經常無償加班,有汗出無糧出。到《雪》1937年上畫一炮而紅,意外賺到盤滿缽滿,和路迪士尼突然宣佈取消分紅制,拒絕與員工共享富貴。不滿日積月累,迪士尼製作室的動畫師1941年發起長達九星期大罷工,1,200名員工之中過半數參與,最後勝利結束,成功爭取夜晚加班費升至雙倍。

但白雪公主和大罷工也開始了迪士尼的成魔之路。除了取消分紅制,罷工結束後留下來的員工亦被秋後算帳,工會成員不是被公司杯葛,就是在裁員時成為首先開刀的對象。和路迪士尼本人痛恨工會,曾在信函裡認為罷工後員工流失是「洗乾淨了公司」。他在罷工前亦成立了公司操縱的黃色工會,違反美國勞工關係局法例,偽裝代表員工,以此拒絕員工成立自己工會的要求。

Share