避勞工福利　賤老闆隨時逼你假自僱

嗱，相信各位日日追開惟工新聞嘅朋友，都會知道乜叫自僱人士，即係小販、的士司機諸如此類喇。但大家又知唔知有時賤老闆甚至會逼你扮自僱人士？

現時《僱傭條例》唔保障自僱人士。唔少無良僱主為咗逃避法例規定需由僱主提供的勞工保障而強逼員工簽署自僱合約，甚至在僱員離職時先改口，話佢地屬自僱，無晒遣散費或長期服務金。

有法律保障　唔洗咁驚驚

打工仔對依種惡劣行徑除左昂頭叫罵一句：「你老闆！」之外，就算唔小心中咗伏，已經簽約亦唔係世界末日。「假自僱」依樣野其實係有法律保障架！係處理勞資糾紛時，法庭會按以下依幾條準則判斷係咪假自僱，包括：

1. 工作工具由對方提供
2. 工作時間由對方決定
3. 雙方有明確的分賬方法
4. 強積金以僱傭模式供款

唔好太灰心 曾經有例子真係推翻咗假自僱！

2009年麥當勞外判電單車速遞，外判公司要員工簽自僱合約，員工遇到交通意外無賠償拎，而且無有薪假期和強積金，壞車就要扣薪賠償，麥記真係賤到無朋友。最後事件經工會投訴後得到解決。

職場陷阱層出不窮，老闆刻薄不擇手段。最後，惟工新聞呼籲各位，打工仔如有疑問，切勿啞忍，我們歡迎各位爆料。