【標準工時系列】商會：應禁工人階級倡議政策

【標準工時系列】標時諮詢會 老闆現獸性
商會：應禁工人階級倡議政策

編按：政府正就標準工時立法進行公眾諮詢，諮詢期於7月31日屆滿，詳情見標準工時委員會網頁。惟工新聞直擊諮詢現場，為打工仔探測輿論走勢。
 

【惟工新聞】標準工時立法公眾諮詢現正展開，不少僱主如臨大敵。昨日舉辦的諮詢會屬僱主團體專場，出席者幾乎一面倒表示反對，紛紛丟下狠話，預言一旦立法將導致通脹暴升、大肆裁員、500萬人上街反政府，更稱應拉倒公眾諮詢。有商會代表甚至揚言標準工時極為「可恥」，政府應該制止工人階級倡議政策。會上標準工時委員會各委員大致保持中立，未多作表態，惟委員之一的香港工業總會主席劉展灝沒有避嫌，大力贊同台下僱主，指青年求職不可嫌工資太低。

未做功課  不辨標準工時最高工時

諮詢會昨夜於美孚社區會堂舉行，逾60人出席。與會人士發言頗為踴躍，多名僱主強調香港的「自由市場」不得損害，稱「依家工人惡過老闆」、「香港無唔好嘅老闆」，政府毋須監管，並翻舊帳抨擊先前的最低工資立法，堅決反對政府進一步規管工時。

根據委員會提供的資料，相關立法建議分為「標準工時」與「最高工時」兩部份，工作時間超出標準工時可獲額外加班費，若再延長至超出最高工時則屬違法。惟會上多名僱主未有做功課，多次揚言標準工時立法將阻礙工人賺取加班費，卻不知道標準工時正是確保員工可得到加班費，防止出現員工無償加班、僱主食霸王餐的情況。

不過會上亦有出入口公司老闆認為立法後員工「有權要求補假或者補薪，呢樣會令到公司成本大大增加」，因此反對標準工時，變相默認目前打工仔確有無償加班。

綜援淪商家福利  稱標時致500萬人上街

部份與會者聲稱現時經濟狀況良好，「有工無人做」，打工仔若不滿工時過長可以自行辭職另覓工作，並指香港不存在無良僱主，毋須政府監管工時。

委員會主席梁智鴻詢問若日後經濟轉差，打工仔失去議價能力時是否需要標準工時保障，港九粉麵製造業總商會永遠會長馮秉孝辯稱即使屆時工時大增，打工仔若不滿待遇可以申請綜援，「如果啲員工無嘢做，可以伸大手板問政府攞綜援，依家最興，政府咁多錢派，呢樣嘢唔使驚」，將保障勞工待遇的責任轉嫁政府。

為反對立法，會上不斷有僱主以各種「後果」威嚇政府，有飲食業老闆反問梁智鴻若規管醫護人員工時能否維持現行公營醫療體制，人力資源公司代表則稱最低工資已導致「出街食個雙拼飯要八、九十蚊」，一旦標時立法將進一步引爆通脹。連七一遊行也被僱主借用為威嚇手段，有清潔公司老闆預言商家在立法後將大規模裁員，失業市民勢必上街抗議，「到時可能唔止51萬，而係500萬人出嚟喎，大家諗下後果有幾嚴重」。

非典型「僱員」反標時  要求保障僱主

儘管諮詢會邀請僱主團體出席，但會上卻有自稱「僱員」人士發言。一名以「僱員」身份發言的女士指遇到經濟不景時，政府不可只保障員工，亦須保護僱主。她又指目前勞動市場資訊透明，打工仔可上網查考各行業工時長短再選擇工作，反對政府規管工時。

人力資源公司僱員伍先生則認為工時難以界定，例如下班後仍須上網工作，標時立法也規管不了。但當主持吳明林問到是否應規定企業補償僱員下班後上網或用手機的工作時間，他卻未表同意，反指「我只係話難界定，頭先有啲委員喺度篤機，究竟係咪做緊嘢呢？」

物流公司老闆開腔  揭工聯會會員非工人

物流公司老闆陳先生亦反對標準工時，自稱中立，並指名回應台上勞方代表、工聯會理事長吳秋北，表示自己以前也是打工仔，而且是工聯會三十年的資深會員，「上次我同理事長吳生講，我仲保留住工會會員證」。

指父母應教導子女接受低薪  政協劉展灝贊同

僱主多番讚揚香港的「自由市場」，反對政府監管勞資關係，馮秉孝批評最低工資、勞工保險和強積金妨礙企業招聘，懷念未有《僱傭條例》成立的年代，「香港六十年代發展到依家，以前邊有咁多框框」。

支持「自由市場」之餘，僱主卻不同意青年在勞動市場有選擇工作待遇的自由。一些僱主斥責青年「七、八千蚊就唔做，係佢地父母有問題」，要求家庭嚴加管教，並指求職應該不問工資多少，只求取得經驗。身兼香港工業總會主席的資方委員劉展灝並未避嫌，直接在會上表示支持，又指香港年青人已經很有「福氣」，「歐洲青年失業率高，無論乜嘢人工都無人請」。

劉展灝是四川省政協常委，今年四月曾對傳媒表示反對標準工時立法，上週五又稱「佔領中環」將打擊投資者信心。

僱主催散場  回家飲可樂

反對呼聲強烈，部份僱主斥罵政府無事找事幹，浪費時間，立法對任何規模企業的僱主都有害，要求拉倒標準工時諮詢。

馮秉孝直言標準工時「絕對唔應該由工人階級倡議，再由政府立法制訂」，又稱倡議立法「係策動工人向僱主苛索的行為，極為可恥」，政府應嚴加制止。他指標準工時「令老闆毫無尊嚴，俾工人喺度敲詐」，希望政府停止諮詢，讓老闆回家吃晚飯，「唔好傾，睇下電視，飲杯冰凍可樂好過啦」。

諮詢會於晚上8時50分結束，不知香港有多少打工仔尚未收工？

諮詢會僱主專場金句摘錄

1. 「（標準工時）絕對唔應該由工人階級倡議，再由政府立法制訂……係策動工人向僱主苛索的行為，極為可恥。」
2. 「樣樣嘢都有框框邊個做老闆？無人做老闆邊個最痛苦呀？就係普羅市民。」
3. 「如果啲員工無嘢做，可以伸大手板問政府攞綜援，依家最興，政府咁多錢派，呢樣嘢唔使驚。」
4. 「過去十年嚟香港已經冇唔好嘅老闆，唔好嘅老闆係請唔到工人。依家工人係惡過老闆架。」
5. 「我地僱主唔係盲架，唔好嘅僱主一早執咗，唔好從剝削嘅角度去諗啦。」
6. 「經濟唔好嘅時候我覺得政府唔應該淨係protect員工囉，要fair啲，protect返僱主囉。僱主如果offer唔到咁多，員工係咪都要商量下呢。」
7. 「你唔好當老闆傻瓜，邊一度啲老闆投資咗係無話事權架？（標準工時）令老闆毫無尊嚴，俾工人喺度敲詐。」
8. 「全世界邊個地方有咗標準工時會全民就業，老闆又開心，國家又開心嘅呢？」
9. 「你睇下外國啲自由國家，好似冰島破產，就係因為福利社會。」
10. 「日本訂咗標準工時之後係點？後果係近三十年都經濟衰退。」
11. 「香港最近個環境，又上街遊行50萬，（立法會）又流會，啲人想嚟香港投資都拿拿聲縮沙啦。仲加埋標準工時係雪上加霜，我話死梗架喇。」
12. 「（如果立法後經濟不景要裁員）到時可能唔止51萬（人上街）喎，而係500萬人出嚟喎，大家諗下後果有幾嚴重。」
13. 「（最低工資立法後）不斷提升公司經營成本，今時今日出街食個雙拼飯要八、九十蚊，羊毛出在羊身上，成本都係轉嫁顧客。」
14. 「我唔理你大學生定咩畢業，你唔需要理你有幾多錢人工，首先你要有個經驗。人地俾你最低工資，俾你入到行，係你嘅幸運。」
15. 「八十年代比較多中國移民湧入……以前所有大陸嘅移民前線咩職位都會擔當，好不幸地依家輸入嘅新移民都係有錢嘅，住緊凱旋門嘅，唔需要出來打工。」
16. 「希望你地（委員會）唔好搞咁多嘢，俾我地有得返屋企食飯。……唔好傾，睇下電視，飲杯冰凍可樂好過啦。」

相關報導：
標時諮詢繼續 委員發表「莊閒論」