Error message

Deprecated function: The each() function is deprecated. This message will be suppressed on further calls in menu_set_active_trail() (line 2405 of /home/wknews5/public_html/includes/menu.inc).

打工仔女為何要組織起來抗議政治性炒魷?

24/08/2019 - 12:19pm
Share

標籤

編按︰港龍工會主席因為網上言論被炒,本身是否合法?同樣身為打工仔女的我們,又可以做甚麼支持因為政見而被剝奪工作機會的工人?當政治審查伸延至工作場所,打工仔女也應該發動工業行動,互相組織起來抵抗。一方面反抗企業對工人的報復行為,另一方面也跟同業聯絡,認清香港社會在政治和經濟層面對工人的壓迫。惟工新聞轉載了工黨副主席麥德正的文章,討論打工仔女發動政治性罷工抗議公司打壓。文章標題原為〈政治性炒魷啦,罷工即係冇得搞啦!〉。


港龍工會主席被炒,之前國泰3個機師先後被解僱及「被辭職」,唔係因為佢哋工作表現有問題,係因為佢哋反送中,呢啲係政治性炒魷,之後其他僱主有樣學樣,你灰唔灰?

灰?即係等死啦。你真係想?唔灰?咁唔係得把口,佢有政治性炒魷,我哋更要諗政治性罷工!

先講法例,呢次炒港龍工會主席,係違反《防止歧視職工會》條例。員工因進行工會活動受資方打壓,可循兩方面進行追討:

一、 要求勞工處檢控僱主觸犯《防止歧視職工會》條例,被定罪者最高可被罰款10萬元。

二、到勞資審裁處向僱主追討不合法解僱補償,或要求復職。如法官判決為不合法解僱,員工可獲最多15萬元補償金,或者復職。

不過,航空公司財雄勢大,資方炒得工會主席,唔會唔識法例,甚至預埋條數,打官司輸咗賠得起。就算出幾百萬炒幾個,自獻維穩費向中央表忠,條數抵呀。法例仲有得爭取復職,呢樣緊要,資方唔係有錢大晒。你炒我,法庭判我入返去開工,呢樣就真係工會權利。

法例技術嘢呢度唔多講,因為就算有乜法律都好,如果人人鵪鶉,法律幾好都冇用。

人鵪鶉,未必純粹細膽,而係覺得有啲嘢未關自己事。示威者俾警察打到仆街,又盲眼又嘔血;連儂牆有人被斬;黑警入病房虐打市民,大家睇完入心入肺,覺得十分恐怖,十分悲憤。因為覺得自己有份遊行,呢啲環境又同日常生活有關,打在佢身,痛在我心。但政治性炒魷的話,好多人覺得唔關我份工事,會話我老闆唔會咁炒人,我老細係黃絲嚟嘅。唔會嬲到話炒佢我罷工。

大家記唔記得617及85政治性罷工起源呢?第一次,係612警察鎮壓示威,第二次,係元朗黑社會打人。其實都唔關你老闆事,但好多人想罷工。警方政治性鎮壓、黑社會政治性打人,都可以引發罷工,大財團政治性炒魷點解唔可以呢?大部份香港人都係打工仔女,政治性炒魷,殺到埋身呀!

打工仔女為老細出賣勞力,收工之後,仲面對政治性炒魷威脅,連思想自由都冇,真正失去人權、自由。政權勢力鼓勵公司內部互相舉報,幾咁可怕,威脅我哋嘅思想、良心和表達自由。唔使送中,極權已降臨,伸展到你公司,去到你份工。

企業在商言商,都免不了向政權跪低,向中央交人頭,其他領域禁言和審查係點可想而知。再咁落去,好快香港人表態支持公義都會被炒,香港人唔係個個可以移民,咁樣白色恐怖,日日打壓,唔係警察拉你,而係你返工地方處處有監控,令你自行收皮。香港人活在打工監獄,過囚牢生活。

617及85政治性罷工未夠全面,仲係逐步實踐階段,但係官商一體已經好有意識,用政治性炒魷向香港人開刀,點解我哋唔諗以罷工回應?香港人唔係話炒就炒!

航空業工會方面有反擊行動,大家一定要關注及支持呀。大家認認真真諗下一步罷工點搞,唔好令呢班被炒嘅戰友齋送頭!

 

相關文章:

發起罷工但不想打工仔送頭的話,要留意甚麼?

8.5 罷工訪問合輯

Share