極右政黨崛起 金色黎明肆虐希臘

希臘政黨金色黎明早於1980年成立，直至1993年註冊成為政黨。金色黎明嘅特色，就係將失業、貧窮──所有經濟問題歸因於移民，例如該黨國會議員曾經喺國會上以「次等人」形容希臘境內移民，甚至組織成員當街持棍襲擊移民及異見者。而且該黨黨徽極似德國納粹黨，該黨領導人更曾否認希特拉有屠殺猶太人的罪行，惹公眾質疑該黨是否代表新納粹主義。

本來金色黎明無辦法引起公眾注意，譬如1996年希臘議會選舉，金色黎明都只係得4500票左右，一個議席都拎唔到。但去到2012年選舉，金色黎明得票數竟一下子跳到42萬，一口氣奪18議席。

到底點解？點解一個主張排外嘅政黨支持度忽然大升？

█經濟谷底　極右黨借機上位

同世界上各個地方一樣，排外總有市場。事緣近年希臘受債務危機影響，政府要不斷推行財政緊縮政策，民眾福利、收入大減，失業率極高，結果只有叫苦連天。咁既處境就俾金色黎明一個機會，藉住將所有問題賴落移民度，煽動群眾，並且主張鐵腕嘅統治策略，然後極速上位。放眼受債務危機拖累嘅歐洲各國，例如奧地利反移民及反伊斯蘭政黨得票上升，同埋挪威執政黨保守黨與反移民政黨合組聯合政府，都顯示出經濟不景為反移民情緒加溫，有啲啲似二戰前夕咁樣。

最近金色黎明都因為涉及謀殺左翼音樂家菲薩斯，政府終於決定打擊金色黎明，一下子將該黨四位議員、黨領導人及副手拘捕，並控以參與犯罪團伙、謀殺、襲擊和洗黑錢等罪名。惟工百科有時都好驚驚，唔係驚香港依家會有樣學樣，係驚人類總係會重複相同嘅錯誤咋！