打份工，收order咋？留返同個官講啦——由DR毒針案講起

【惟工百科】尋日惟工記者睇蘋果訪問DR毒針案次被告陳冠忠 [1]，見到報導當中引述陳冠忠話：「佢（首被告周向榮）話我口供唔隊佢出嚟？我隊佢出嚟，我日日俾佢鞭打呀！嗰時打緊工呀，你會唔會隊老細出嚟呀？除非我唔玩㗎啫。」甚至聲稱老闆周向榮要所有落過口供嘅員工都俾返份口供紙佢睇。

記者睇到呢度就只能搖頭嘆息。作為打工仔，搵錢還搵錢，如果工作內容違法，就一定要拒絕——唔係因為咩道唔道德，合唔合乎職業操守，而係你收order犯法，到頭來係你自己上身。甚至如果你保你老細，其實即係變成共犯，而且老闆好有可能為咗逃避責任而由得你死。就好似陳冠忠受訪嗰陣咁講：「依家好似唔係政府告我，好似係佢告我：『喂你錯呀，關我鬼事呀，係員工錯呀！」出問題嗰陣，打工仔真係唔需要陪老細癲。袋份糧係唔包坐監嘅。

等我地重溫「開工防身術」第二式：拒絕違法工作

開工嗰陣如果發現工作內容涉及違法行為，就要知道呢份工唔對路，都係走為上著，甚至應該報警求助。

有啲違法行為顯然易見，例如走私或者黃賭毒；
有啲就好模糊，例如傳銷種金之類；
亦都有啲係習非成是，全行犯法但個個都由得佢，例如中介扣起外傭護照。

如果你知道有啲行為違法，就咪   做。即使係從事政治工作，要進行有法律風險嘅抗爭，都要係出於自願，而唔係因上司命令。唔清楚係咪違法，覺得有疑問，就問下法律意見，市面上係有免費法律諮詢服務，咪   信三姑六婆。記住，你只係打份工，唔   駛為老闆犯法，唔存在拍爛檔幫一次手。即使你係跟order做嘢，違法都仍然係違法，唔係抗辯理由。《僱傭條例》亦都保障員工，當被要求做違法行為時可以直接離職，唔需要俾任何通知或代通知金。

參考資料：
1. 次被告與老闆由同坐一條船變針鋒相對「周為賺快錢着了魔」

相關文章：
【搵工須注意事項三】開工防身術三式