【廢青打散工手記】搵工小記

28/05/2017 - 5:05pm
Share

Number of views

2236

原來jobsDB每日成千上萬份短期/兼職,真係乜嘢都有。我從前都唔知可以有咁多種類。而jobsDB個app真係相當方便,upload個cv,9 click就可以申請,求職信頓變old school,科技真係日新月異呀吓(年紀大mode),加速令人變成無文化無內涵,以前教落寫求職信乜格式乜禮儀,都唔駛再學咯。但當然,速度文化帶來的問題是來得快去得亦快,好幾份9 click的工,搵我我都懶去面試。

試過有保險公司搵臨時文員,電話直接問,做乜9我做開全職會走去做兼職,我解釋完,佢就問我有無興趣做星期一至五的文員,短短地三個月,但因我另有freelance,唔想全職,就拒絕咗佢。另外有份,我申請完都唔知係乜公司,個男人whatsapp叫我去油麻地彌敦道Starbucks見工,臨時文員喎,佢到底想我喺咖啡店表現咩skills佢睇?最後因為當日晏晝老竇臨時話同姪仔飲茶,我就無去到,臨in半小時whatsapp話something come up就算。

剛剛去咗尖沙嘴見工。事緣是隨便申請咗一份珠寶展event helper,60蚊一個鐘,因為要講英文普通話。之前個agency半夜三更whatsapp問我攞近照,俾着平時我可能會問候佢一大爛餐,我咩樣同份工有咩關係先,頂你。不過我照sent算了,依家我相信你的樣子如何,你的日子也必如何,因為份工最終無請我 XD。然後佢又refer咗去另一個client。今日差不多下午一點,同我講一陣六點見工得唔得,作為一個做咗好幾年嘢嘅人,深深感受到自己的工作倫理真係植入血管,我首先諗,咁我着咩衫好?然後就諗,無帶cert喺身喎。

結果我着咗恤衫裙、西裝褸、有踭Oxford鞋。正經到自己都懷疑自己,嗰60蚊一個鐘,使唔使呀大佬?上到去,係一間one man band印度佬珠寶公司,其實已經覺得奇怪,幾日貨仔event helper,浪乜費時間見啫,原來佢想請full time assistant,佢好似好想請我,問我做full time問咗三次,最後佢話,咁你有無親戚朋友refer,好desperate喎阿哥!

有排在temp job場合遇到一個之前跟過我的實習同學,佢話佢都係做散工,我問佢,你做緊咩工,佢好尷尬咁話,同社工完全無關係架喎。睇落越來越多人寧願選擇做散工,有另一套人生規劃(就係無規劃?),這是在我開始吊吊揈生涯以後才發現的。而老竇早排話我,正經搵工啦。我大叫,我有嘢做架,你估我真係廢青咩。我明嘅,唔使定時定候返工,又要做嘢的freelancer,上一代未必理解到。最近思考緊點樣可以令無王管的工作生活有效率啲,實驗下,又會係幾有趣的題目。

Share

小圓。前勞工組織幹事,一件有良好生涯規劃的80後,人生中段出現天氣不似預期的縫隙,以大驚小怪及隨遇而安的心態,踏上了散工之旅,發展另一套工作倫理。