【不正經勞法系列】 詳解勞工處颱風及暴雨警告下的工作守則

21/10/2016 - 2:42pm
Share

標籤

編按:颱風到來,一眾打工仔興奮不已,但事實上打風是否就代表不用返工?黑雨之下提早收工,老闆竟然可以發警告信,當打工仔偷走?工會幹事劉家樂撰文詳細講解相關勞工法例,各位打工仔小心留意。

文:工會幹事劉家樂
 
呢幾日天氣情況十分惡劣,好多打工朋友都睇住個天掛黑色暴雨,就開心到準備執嘢收工。不過,大家可能讀書讀得太耐,真係以為黑色暴雨,八號風球可以立刻收工,但事實可以話比大家聽,其實惡劣天氣警告唔一定可以立刻放工的。
「惡劣天氣唔使返工」印象從何而來?
 
勞工處就住惡劣天氣警告出咗一份叫做「颱風及暴雨警告下的工作守則」,入面講到唔同的天氣情況有唔同的做法,例如話八號風球,黑色暴雨唔好要求員工上班等等。我相信好多人其實無睇過呢份嘢,所以基本上對惡劣天氣應該點做嘅想法喺邊道得來?
 
讀書。
 
讀書個時,我地好清楚知道黑色暴雨,紅色暴雨,八號風球以上就唔洗返學,咁好明顯出到去做嘢都係咁啦!但其實呢,要知道惡劣天氣警告訊號並唔代表一定唔洗返工。點解唔洗返學?係因為跟據教育局通告第4/2016號嘅《熱帶氣旋及持續大雨幼稚園及日校適用的安排》,文件開宗名義講到「本通告內容與學生及 教職員的安全有關,各學校務必遵守有關安排,並採取相應的行動。」所以讀書打風唔返學係一定要做。
 
讀書返工大不同 「指引」對老闆無約束力
 
但返工呢?sor,涉及到嘅文件就喺「颱風及暴雨警告下的工作守則」,即係咩嘢?睇下入面引言就知道呢個指引係咩嘢來。
「本處擬定了這本小冊子,就颱風及暴雨警告下的工作安排提供意見和實際指引。雖然這小冊子並非法例的一部份,我們建議僱主應參考這些指引,以制定合適的工作安排,並採納具彈性的處理方法。」
 
即係咩嘢?就係同你講其實呢我地比啲老闆一個指引啫,做唔做唔關我事嘅。咁大家回想返「工資保障運動」同「合約工時」都係同一原理啦,比個指引啫,跟唔跟就你嘅事啦!
 
實際安排須看僱傭合約 
 
的確,呢一份其實只不過係一份指引,並唔係有力嘅工作安排。咁有力嘅工作安排喺邊?其實就喺你嘅合約入面,同埋當日僱主同你嘅安排啦!所以簡單啲講,如果咩嘢都無講,出面打十號風球,咁我要唔要返工?答案係要。
 
所以,有朋友個朋友做學校,佢同我講:「我有個同事5點45分收工,5點半掛黑雨佢走咗,校長話要出警告信,合理嗎?」其實係得,因為惡劣天氣唔係立刻走,而係要留喺安全地方,所以早走其實同偷走無分別。同埋如果你地喺工作期間遇上惡劣天氣,係要一路做嘢做到收工先得。
 
例如保安清潔等工作,喺合約入面其實好多講明惡劣天氣要繼續上班,所以此類工種一般其實都要冒雨工作,當然有一啲位置例如室外崗位可能因為危險因素而不能工作,咁僱主就可能因為咁唔安排員工返工,或者叫佢去其他室內工作崗位。咁當然,如果其他人嘅合約或工作守則寫明係跟上述指引嘅,咁就一切容易明白了。
 
總結來講,各位出來打工嘅朋友,唔好FF咁多啦,打風落雨唔代表唔洗返工,一切都要睇你同僱主有無喺惡劣天氣工作下作出工作協定了。
 
打風後上班途中受傷 屬工傷範圍
 
咁講起打風,就講多兩講,跟據僱員補償條例第5條F項指出:
「如僱員遭遇意外時,僱員於烈風警告或暴雨警告期間內,作符合下述規定的作為,則 僱員遭遇的意外,須當作是在受僱工作期間因工遭遇的意外─
(i) 在其居所與其工作地點之間,並在該日其工作時間開始前4小時內,採用直接路綫 前往其工作地點,或在其居所與其工作地點之間,並在該日其工作時間終止後4小 時內,前往其居所」
 
一般而言,上班途中受傷係不計工傷,但如果打風後4小時內你要仆返公司而出事呢,就都可計算工傷的。
 
打風落雨,對社會來說的確是百害而無一利,但為何一眾打工仔為咗一個打風假又跪又跳舞?反而,會唔會係我地本身嘅工作同生活已經十分唔平衡,先會出現呢種放半日假都感動流淚嘅情況呢?
 
Share
工會作者,過去經常出入勞資審裁處,處理不同行業勞資糾紛。主要針對安老,美容,音樂行業為主