打風放假 服務業除外? 別將快樂建築在他人危險之上

02/08/2016 - 12:47am
Share

標籤

【惟工百科】八號風球現正懸掛,今天(82日)全日可能停工停課。一天額外的假期,對於一眾深受長工時之害的打工仔女來説自然是天大喜訊,但另一邊廂,不是人人在惡劣天氣之下都可以停工。不少餐廳和娛樂場所為發打風財,紛紛要求員工繼續上班,毫不顧及其安危。以下的六件事,惟工新聞提提大家在明天或其他惡劣天氣下盡量不做,以免傷及無辜,益了無良老闆。

.叫外賣

打風出街唔方便,不如叫外賣?喂阿哥,你出街唔方便唔通人地送外賣好方便?出面横風横雨隨時塌樹跌招牌,唔係仲要人冒死送飯俾你掛?

.出街食飯

好啦唔叫外賣,出去食飯都唔得?嗱,你食完晚飯人地仲要留低收舖,到時都唔知有冇車走,第二朝早一早要返都一樣咁難。都係自己煮個麵好過。

.行商場

打風期間商場照常營業,可能係呢一至六項入面最累街坊。首先,商場清潔保安客戶服務員全部要返;然後呢,商場舖頭老闆就有好大機㑹要員工返埋。成個商場,加加埋埋都成百人。如果你心諗好多商場都有地鐵接駁,搭地鐵行地底夠安全喇卦?咁你又諗諗,做地鐵點解又要打風都照返?

.K

打風放假連夜呼朋引類唱通宵K,在香港地是可能的,某大連鎖K房集團屬下就有多間分店在八號風球期間照常營業。不過越多人唱打風K,要在颱風下冒險出門招呼客人的服務員就越多,還請三思。

.睇戲

悶悶地入戲院睇場戲又點?無錯,好多戲院無論紅雨黑雨定八九十球風球照樣開場,但如果你未買飛,都係唔好夾硬入場要戲院上下員工招呼你喇。如果你打風前已經買咗飛又點?唔使太擔心,有院線係可以俾觀眾之後七日內換飛轉睇另一場,詳情請向你幫襯的戲院查詢。總之大家唔使橫風橫雨出街,對大家都好。

.去麻雀館開檯

香港麻雀館有個傳統,就是全年無休,無論打風落雨照樣在各位雀友身上抽水。八球風球打四圈,快樂,無比嘅快樂,但係要麻雀館服務員打風返工,俾你食到十三么都背脊骨落。打風約雀局,都係返屋企打牌算啦。

可能有讀者會話:打風停工,可能好多人會冇咗一日糧噃!但調返轉講,咪就係因為無良老闆趁打風扣人工,先逼到打工仔女要冒險返工!

最後提醒廣大打工仔,僱員補償條例規定, 在八號或以上颱風訊號、紅色及黑色暴雨警告訊號生效其間, 如僱員在上下班期間(四小時內)受傷即屬工傷, 僱主需按規定賠償。如不幸遇上意外, 切勿私了, 令自己的權益受損。
 
 
Share