賀呃like破千 十問惟工幕後黑手

1. 
問：惟工新聞？咩嚟？食唔食得？

答：香港地，如果打咁嘅工，住咁嘅樓，呼吸咁嘅空氣質素你都哽得落，惟工新聞梗係食得啦。

2. 
問：無情情講咩工人？家陣香港剩返啲工人唔係菲律賓嚟就印尼嚟之嘛。

答：依家office夠無boy啦，得「辦公室助理」啫，一隻蚊改個名叫做獅子就會咬得你死咩？只要老竇唔係李嘉誠，只要唔返工搵食就手停口停，我地有邊個唔係打工仔女吖唉。

3. 
問：你哋究竟係咩人？有咩背景？

答：好不幸，中聯辦同CIA都冇泵水助養呢班孤兒仔。我哋只係幾件打工仔，有老有嫩有男有女，平均人工唔過全港入息中位數，工餘出新聞當做義工，窮人賣屎忽救香港。

4. 
問：咁你哋點搞呢壇惟工新聞出嚟？

答：今年七月幾個friend吹水，依家行過報紙檔有幾多份報紙靠得住，開電視難道無線亞視又信得過，不如自己落手搞真係屬於打工仔嘅新聞。既然人人習慣上網，返工返學又攰未必想睇咁多字，索性整圖片新聞幫助消化，畀人笑下抖下。最重要當然係，放上網唔使錢。

5. 
問：但你哋啲新聞咪又係左抄右抄居多……

答：所以我哋需要你！有猛料記得爆過嚟，我哋會嘗試跟進。We love you！同埋難聽講句，你真係以為報紙啲新聞就唔會左抄右抄？我哋都有人做傳媒知咩事架……

6. 
問：打工仔睇惟工新聞有乜著數？

答：反洗腦。呢度唔會賣版位畀X原人力資源顧問有限公司周小姐及其同類，等佢哋日日教你自己壓自己價。呢度你會見到世界各地打工仔嘅真實辛酸，現實係，周小姐永遠唔會刻苦耐勞得過富士康工人，而富士康工人亦永遠唔會逗到周小姐份糧。

7. 
問：返工畀老細見到我睇惟工新聞，點算？

答：節哀順變，其實畀老細見到你返工上Facebook已經要節哀順變。

8. 
問：成日見你哋啲新聞放貓貓相但又一單貓新聞都冇做過，怕唔怕啲貓罷工抗議？

答：怕，怕到暈。大家千祈咪話佢哋知，唔該晒。

9. 
問：突破1000個like，依家咩心情？

答：假如三個月內突破唔到1000個like，我哋會傷心到好似阿叻咁跪返屋企，好在多得大家支持。

10. 
問：惟工新聞諗住之後點發展？有無大計？

答：用Facebook做平台純粹貪就手，唔係貪佢畀NSA睇實晒。惟工新聞正式網站即將啟動，內容更爆題材更廣，請各位拭目以待。