【廢青打散工手記】珠寶展打雜:一粒石貴過我年薪

11/06/2017 - 9:58am
Share
去完印度回來,過埋個年,財散人安樂,就開始9搵工。做了event helper同問卷調查員,之前傾落的文集有錢開工了,跟住又去見工做商場客服,結果2月在重新適應打工與忙亂之中度過。
 
1. 珠寶展helper,經agency介紹,開工又完工了。60蚊一個鐘,由於是在博覽館,又另有每日$50交通費,不過交通費最後是用突有餘的。
 
2. 今年與印度佬有緣,老細是兩個印度佬,一個駐泰國的銷售部A,一個是駐印度管廠房生產V。難得遇上兩個都幾好的印度佬。阿印度佬又趙印度煙,陣味好似返咗印度咁。
 
3. 原來的工作要求最主要是翻譯及sell客。第一日來到,佢地就已經幫我整好進出珠寶展的名牌,保安是頗為森嚴的,又要拎身份證又剩咁。其實最後我做得最多,係執頭執尾,買下外賣,運下貨,有得執下神沙時已好開心。
 
4. 到咗個攤位,印度佬A就問我,有無做過珠寶,我話無,佢哋已經唔想睬我。粒粒石都差不多樣,佢地正在放display,我想幫手,見佢放緊藍色石頭,我就將手邊的淺藍石遞俾佢,佢地話,呢個係海藍寶喎。而佢地放緊藍寶石,個價位差十倍。Sorry我真係識條鐵啊,頓時覺得自己好笨7。其後幾日都在努力觀察石頭,丫,發現原來同一款石頭,顏色光澤就是有些不同喎。
 
5. 駐泰國的印度佬A講完美英語。原來佢在美國讀大學,讀完想搵工,搵唔到,跟咗個在紐約的叔叔做跟班,慢慢學點樣做珠寶,如果佢當年搵到工,佢今天好可能就是一個會計師。我話,哇,珠寶好玩好多。佢話所以佢每一日都感謝主。
 
6. 印度佬V係負責管廠切割寶石的。我幫手接大陸客之時,發現根本問唔到啲晶石寶石外文名同中文名翻譯,印度佬V叫我拎紙筆,逐樣講,串埋個名俾我聽,產地切割,逐樣教。我查返晒中文名,先慢慢叫幫到手。身為一向身無長物的我,覺得寶石真係好好好睇。
 
7. 佢地每日都會俾一舊水我食飯,好彩咋,因為博覽館食飯實在太貴,我好多時會去食咖喱飯,一盒成70蚊無嘢飲呀。我要自己拎幾蚊出來先至可以在starbucks買杯最平的coffee of the day,但唔飲咖啡好難捱,因為真係唔多客。
 
8. 珠寶呢個行業好好玩。好玩在睇人睇貨。有時有客到,佢地都唔sell,同我講,呢個唔會買架。有時佢地會主動同啲客打招呼,原來是睇過幾次的翻頭客,早兩日睇過邊一款邊一粒,都講得出。我一定會問佢地咩價,唔會自己講,因為佢地個個客都開唔同價。呢一行,一粒石可以轉幾手賺幾轉,啲人劈價一劈唔係一半,係10倍,佢地一唔高興就同人講謝謝叫人過主。睇佢地講價拉鋸,好好睇。
 
9. 一粒細過手指尾塊指甲、暗啞無光的石是我一年的薪金,佢地計數是每卡計美金的,好好彩我無跌過一粒落地下,真心係驚的。每日返工第一件事,拎個鉗仔將寶石逐粒翻返向正面,動作之微細,非常治癒。
 
10. 佢地久唔久又同我吹下水,講下我去旅行,問我點睇印度人。我直接話覺得印度人self-centered,長年不在印度的A話係selfish,不過,佢在這個社群之中,如同在泥沼,最好唔好郁,越掙扎就越下沉。我估都與好多稍有批判能力而處於社會上層的人一樣,不願意放棄既得利益。
 
11. 吹水講開時薪,佢地話,agency都食水幾深喎。佢地同我簽time sheet時又唔計我遲到,臨走俾咗3舊水貼士我,話多謝我的服務,又希望今年十月再來香港時搵我幫手,我即刻knock on wood話希望到時不在香港啦。印度佬V返到印度,whatsapp祝我實現夢想。哈哈。
 
12. 忙忙亂亂之中又要學習規律生活與分配時間,做完5日珠寶展先有時間寫文,要學習把最重要的東西先做,我呢個月會努力。
 
Share

小圓。前勞工組織幹事,一件有良好生涯規劃的80後,人生中段出現天氣不似預期的縫隙,以大驚小怪及隨遇而安的心態,踏上了散工之旅,發展另一套工作倫理。